राजन पोकळे; बाहेरच्या लोकांना घेवून टिका नको, जनता जागा दाखवेल…
सावंतवाडी,ता.३१: मंत्री दीपक केसरकर यांच्यावर टीका करणाऱ्या बबन साळगावकरांनी आपण त्यांच्यामुळेच नगराध्यक्ष झालो हे विसरू नये. मात्र केसरकरांना डावलून रिंगणात उतरल्यानंतर किती मते मिळाली त्याचे आत्मचिंतन करावे, असा प्रतिटोला माजी उपनगराध्यक्ष राजन पोकळे यांनी लगावला. दरम्यान सावंतवाडी बाहेरच्या लोकांना आणून साळगावकर केसरकरांवर टीका करण्याचा प्रयत्न करत आहेत. मात्र येथील जनता त्यांना योग्य ती जागा दाखवून देईल. त्यामुळे उगाच केसकरांच्या विरोध आघाडी उघडणार, असे सांगून साळगावकरांनी लोकांची दिशाभूल करू नये, असे श्री. पोकळे यांनी म्हटले आहे.
काल या ठिकाणी पत्रकार परिषद घेऊन साळगावकर यांनी केसरकर यांनी निधी उपलब्ध करून न दिल्यामुळे सावंतवाडी शहरात अंडरग्राउंड वीज वाहिन्या करण्यासाठी जाहीर करण्यात आलेली योजना पूर्ण होऊ शकली नाही, असा आरोप केला होता. या आरोपाला श्री. पोकळे यांनी पत्रकार परिषद घेऊन प्रत्युत्तर दिले.
