“रोझ डे” च्या दिवशी सुरू झालेला प्रेमाचा प्रवास “व्हॅलेंटाईन डे” ला संपला…!

बांदा.ता,१४:  आज व्हॅलेंटाईन डे ला प्रेम व्यक्त करणे महाविद्यालयीन युवकाला चांगलेच महागात पडले. युवतीला जबरदस्तीने प्रेम स्वीकारण्याची धमकी देणाऱ्या युवकाच्या श्रीमुखात लगावल्याने युवकाचा रोझ डे दिवशी सुरू झालेला एकतर्फी प्रेमाचा प्रवास आज व्हॅलेंटाईन डे दिवशी सकाळीच थांबला. कॉलेजच्या समाजमाध्यम समूहावर युवक ट्रोल झाल्याने युवतीने दिलेल्या ‘प्रसादा’ची चर्चा शहरात रंगली.
याबाबत सविस्तर माहिती अशी की, शहरातील एका महाविद्यालयात युवकाचे युवतीवर एकतर्फी प्रेम होते. त्याच्या मित्रांनी युवतीला ‘प्रपोज’ करण्याचे दिलेले चॅलेंज युवकाने स्वीकारले. रोझ डे दिवशी त्याने युवतीला गुलाबाचे फुल देऊन मैत्री करण्याचा प्रयत्न केला.
युवतीने मैत्री नाकारल्याने युवकासमोर प्रश्नचिन्ह निर्माण झाले. कोणत्याही परिस्थितीत व्हॅलेंटाईन डे ला युवतीला प्रेम व्यक्त करण्यासाठी भाग पाडण्याचा त्याने निश्चय केला. आज सकाळीच तो महाविद्यालयाच्या दारात युवतीला प्रेम व्यक्त करण्यासाठी वाट बघत होता. मित्रांनी दिलेले आव्हान स्वीकारत त्याने सर्वांसमक्ष आपले प्रेम व्यक्त केले. मात्र युवतीने तात्काळ नकार दिला. आपल्या मित्रांसमोर नाचक्की होईल या भीतीने युवकाने आपले प्रेम स्वीकारण्याची धमकीच युवतीला दिली. मात्र युवतीने रुद्रावतार धारण करत युवकाच्या श्रीमुखात भडकविल्याने तो खजील झाला. या घटनेची चर्चा समाजमाध्यम समूहावर झाल्याने हा युवक अधिकच ट्रोल झाला. ही चर्चा आज दिवसभर महाविद्यालय व शहरात सुरू होती.