श्रावणी सोमवारनिमित्त श्री देव पाटेकर देवतेचे ऑनलाईन दर्शन…

सावंतवाडी ता.२७: कोरोनाच्या पार्श्वभूमीवर श्रावणी सोमवार निमित्त येथील श्री देव पाटेकर देवतेच्या दर्शनासाठी येणाऱ्या भाविकांना आज “ऑनलाईन दर्शनाची” सुविधा राजघराण्याकडून उपलब्ध करून देण्यात आली आहे.दरम्यान राजवाड्याच्या मुख्य द्वाराशी चित्रफितीद्वारे देवघरातून थेट प्रक्षेपण सुरू आहे.तर श्रावण महिन्यातील सर्व सोमवारी अशाच पद्धतीने भक्तांना दर्शनाचा लाभ दिला जाणार आहे.
कोरोनाच्या पार्श्वभूमीवर यावर्षी श्रावणी सोमवार निमित्त दर्शनासाठी येणाऱ्या भक्तांना देवघरात थेट प्रवेश बंद ठेवण्यात आला आहे.त्यामुळे भाविकांना इतिहासात पहिल्यांदाच ही ऑनलाईन दर्शनाची सुविधा उपलब्ध करून देण्यात आली आहे.याचा भाविकांनी लाभ घ्यावा,तसेच कोणी अगरबत्ती,फुले किंवा प्रसाद देवाला वाहण्यासाठी आणू नये,केवळ सोशल डिस्टंसिंगचे नियम पाळून दर्शन घ्यावे,परिसरात गर्दी करू नये,असे आवाहन राजघराण्याकडून करण्यात आले आहे.