शर्वाणी गावकर ; सावंतवाडी पंचायत समितीच्या माध्यमातून नवनिर्वाचित सभापतींचा सत्कार
सावंतवाडी,ता.३१: जिल्हा परिषद शाळांचा दर्जा उंचावण्यासाठी अंगणवाड्यात शिकणा-या मुलांना इंग्रजी शिक्षणाचा “टच” देण्याचा मानस आहे. त्यादृष्टीने काही अंशी “पायलट प्रकल्प” राबविण्यात येणार आहे,असे मत नवनिर्वाचित महिला बालकल्याण सभापती शर्वाणी गावकर यांनी आज येथे व्यक्त केले.पंचायत समितीच्या माध्यमातून गावकर यांचा आज सत्कार करण्यात आला.यावेळी त्या बोलत होत्या.यावेळी प्रभारी सभापती शितल राऊळ यांच्या हस्ते त्यांचा सत्कार करण्यात आला. याप्रसंगी माजी सभापती मानसी धुरी, गौरी पावसकर, पंचायत समिती सदस्य बाबू सावंत,रवी मडगावकर आदी पदाधिकारी उपस्थित होते.
पंचायत समिती गटविकास अधिकारी विनायक ठाकूर, मधुकर देसाई आदी उपस्थित होते.यावेळी सौ गावकर म्हणाल्या जिल्हा परिषद शाळांकडे आता म्हणावे तसे विद्यार्थी फिरकत नाही.ही वस्तुस्थिती आहे त्यामुळे शाळांचा दर्जा सुधारण्याचा आमच्यासमोर यक्षप्रश्न आहे.या पार्श्वभूमीवर अंगणवाडीत शिक्षण घेणाऱ्या मुलांना इंग्रजीचे शिक्षण दिले गेले.त्याचा फायदा निश्चितच भविष्यात मुलांना होईल आणि इंग्रजी माध्यमाकडे वळणारी मुले याठिकाणी सेमीइंग्रजी च्या माध्यमातून जिल्हा परिषद शाळा शिकतील,असा आमचा विश्वास आहे.त्या दृष्टीने आमचे प्रयत्न सुरू आहेत.
