रेल्वे राज्यमंत्री दाखविणार हिरवा झेंडा : पास असलेल्याच प्रवाशांनी प्रवास करण्याचे राणेंचे आवाहन
कणकवली, ता.०६ : कोकणात येणाऱ्या गणेश भक्तांसाठी आमदार नितेश राणे यांच्यावतीने उद्या ७ सप्टेंबरला सकाळी १० वाजता दादर स्थानकातून मोदी एक्सप्रेस सुटणार आहे. या गाडीला रेल्वे राज्यमंत्री रावसाहेब दानवे हिरवा झेंडा दाखवतील आणि मोदी एक्सप्रेस सिंधुदुर्गच्या दिशेने रवाना होईल अशी माहिती आमदार नितेश राणे यांनी आज दिली.
तसेच या रेल्वेचे बुकिंग केलेल्याच चाकरमानी प्रवाशांनी आपले पास घेऊन प्रवास करावा असे आवाहन त्यांनी केले.
कोकणात जाण्यासाठी ७ सप्टेंबर रोजी सोडण्यात येणाऱ्या मोफत मोदी एक्स्प्रेस रेल्वेची क्षमता १८०० प्रवासी आहे. यासाठी बुकिंग केलेल्या प्रवाशांची यादी पूर्ण करून त्यांना पासेस उपलब्ध करून देण्यात आले आहेत. हे पासेस असणाऱ्याच, बुकिंग असलेल्या चाकरमान्यांनी या रेल्वेमधून प्रवास करावा. बुकिंग केलेल्या प्रवाशांचा प्रवास सुखकर होण्यासाठी हा निर्णय घेण्यात आला आहे. दादर रेल्वे स्थानकाच्या फलाट क्रमांक ८ वरून सकाळी १० वाजता मोदी एक्स्प्रेस निघणार आहे. रेल्वे स्थानकावर स्वयंसेवक नियुक्त करण्यात येणार आहेत.
रेल्वे राज्यमंत्री रावसाहेब दानवे यांच्याहस्ते या रेल्वेला हिरवा झेंडा दाखवण्यात येणार असून यावेळी विधान परिषदेचे विरोधी पक्षनेते प्रवीण दरेकर, भाजपचे मुंबई अध्यक्ष आमदार मंगल प्रभात लोढा उपस्थित राहणार आहेत. तरी प्रवाशांनी सहकार्य करावे, असे आवाहन आमदार नितेश राणे यांनी केले आहे.
