कुडाळ,ता.०८: माडयाचीवाडी, रायवाडी येथील जीवन आधार चॅरिटेबल ट्रस्ट, पिंगुळी संचलित जिव्हाळा सेवाश्रमाने सामाजिक बांधिलकी जपत मराठवाडा भागातील पूरग्रस्तांसाठी मुख्यमंत्री सहायता निधीत ५१ हजार रुपयांची मदत केली आहे. सेवाश्रमाचे संस्थापक अध्यक्ष सुरेश बिर्जे यांनी जिल्हाधिकारी तृप्ती घोडमिसे यांच्याकडे धनादेश स्वरूपात ही मदत सुपूर्द केली.
गेली दहा वर्षे वृद्धाश्रमाची सेवा करत असलेल्या या संस्थेने सामाजिक, शैक्षणिक आणि क्रीडा क्षेत्रातही नेहमीच पुढाकार घेतला आहे. महाराष्ट्रातील काही जिल्ह्यांमध्ये महापुरामुळे भातशेती आणि घरांचे मोठे नुकसान झाले आहे. या अस्मानी संकटात शेतकऱ्यांना मदत करण्याच्या उद्देशाने ‘खारीचा वाटा’ म्हणून जिव्हाळा सेवाश्रमाने हा मदतीचा हात पुढे केला. वृद्धाश्रमाची सेवा करणाऱ्या संस्थेने केलेली ही मदत निश्चितच कौतुकास्पद असल्याचे जिल्हाधिकारी घोडमिसे यांनी यावेळी सांगितले.यावेळी ट्रस्टचे समाजसेवक सुंदर मेस्त्री, राजू बिर्जे, संजय बिर्जे, संदीप बिर्जे, जयप्रकाश प्रभू, बाबा गावडे, तुकाराम परब आदी उपस्थित होते.
