ग्रामस्थ व पोलीस मदतीसाठी धावले; अधिक उपचारासाठी कुटीर रुग्णालयात दाखल…
सावंतवाडी,ता.०४: माजगाव-तांबळगोठण परिसरात एसटी व खाजगी बस यांच्यात समोरासमोर झालेल्या अपघातात केबिनमध्ये अडकलेल्या एसटी चालकाला तब्बल दीड तासाच्या अथक प्रयत्नानंतर बाहेर काढण्यात यश आले. त्याला अधिक उपचारासाठी येथील कुटीर रुग्णालयात दाखल करण्यात आले. त्याच्या पायाला गंभीर दुखापत झाली आहे. दरम्यान बसचा अपघात झाल्याची माहिती मिळतात घटनास्थळी मोठी गर्दी जमली होती. त्या ठिकाणी जमलेल्या नागरिकांनी मदतकार्यात सहभाग घेत जेसीबीच्या साह्याने केबिनमध्ये अडकलेल्या चालकाला बाहेर काढले. सायंकाळी सव्वा चार वाजण्याच्या सुमारास हा अपघात घडला होता.
याबाबत अधिक माहिती अशी की, सावंतवाडी बस स्थानकावरून पणजीच्या दिशेने जाणारी एसटी बस व गोव्याहून सावंतवाडीच्या दिशेने येणारी खाजगी आराम बस यांच्यात माजगाव-तांबळ गोठण परिसरातील वळणावर अपघात झाला. यात एसटी बस चालक प्रशांत गवस (रा. नेतर्डे) केबिन मध्ये अडकले. यावेळी तेथे उपस्थित पोलीस व एसटी बसच्या कर्मचाऱ्यांनी जेसीबीच्या सहाय्याने दोन्ही बस बाजूला करून प्रशांत गवस यांना बाहेर काढले. ते बसच्या केबिनमध्ये अडकल्याने त्यांच्या पायाला गंभीर दुखापत झाली आहे. त्यांना अधिक उपचारासाठी येथील कुटीर रुग्णालयात दाखल करण्यात आले आहे. यावेळी रस्त्याच्या दोन्ही बाजूने मोठ्या प्रमाणात वाहतूक कोंडी झाली होती. दरम्यान आता दोन्ही बस बाजूला करून वाहतूक सुरळीत करण्याचे काम सुरू आहे. यावेळी पोलीस निरीक्षक तानाजी नारनवर, वाहतूक पोलीस राजा राणे, सुनील नाईक, बाळा साटेलकर, दिपक दळवी, रुपेश नाटेकर, सचिन बिर्जे, बाळा कासार, राजू कुबल, चंद्रकांत कासार, आयुष कुबल, माजगाव उपसरपंच बाळा वेजरे, राकेश नार्वेकर, सौरभ कुबल आदींनी बचाव कार्य केले.
