तळाशील होडी दुर्घटना; तिसऱ्या दिवशीही शोध सुरू…
मालवण,ता.११: तळाशील येथे खाडीपात्रात शनिवारी रात्री होडी उलटल्याने पाण्यात बुडून बेपत्ता झालेल्या किशोर महादेव चोडणेकर (वय- ५५) या मच्छीमाराचा आज पोलीस प्रशासनाच्यावतीने ड्रोनच्या सहाय्याने सर्जेकोट ते तळाशील या परिसरात शोध घेण्यात आला. मात्र तीन दिवस उलटून गेले तरी त्यांचा शोध लागलेला नाही.
जिल्हाधिकारी किशोर तावडे, पोलीस अधीक्षक सौरभकुमार अग्रवाल यांनी काल सर्जेकोट येथे दाखल होत शोध मोहिमेचा आढावा घेतला. दोन दिवस उलटले तरीही बेपत्ता मच्छिमार किशोर महादेव चोडणेकर यांचा शोध न लागल्याने कोस्टगार्डला माहिती देण्यात आली. त्यानुसार हेलिकॉप्टरद्वारे शोध मोहीम राबविण्यात आली. मात्र किशोर यांचा शोध लागला नाही. जिल्हाधिकारी, पोलीस अधीक्षक यांनी शोध मोहिमेचा आढावा घेतला त्यावेळी तहसीलदार वर्षा झालटे, पोलीस निरीक्षक प्रवीण कोल्हे तसेच प्रशासकीय अधिकारी ग्रामस्थ उपस्थित होते.
आजच्या तिसऱ्या दिवशीही किशोर यांचा खाडीपात्रात शोध सुरू होता. पोलीस प्रशासनाच्या माध्यमातून ड्रोनच्या साहाय्याने सर्जेकोट ते तळाशील या भागात आज शोध मोहीम राबविण्यात आली. मात्र सायंकाळी उशिरापर्यंत त्यांचा शोध लागला नाही. या शोध मोहिमेत पोलीस कर्मचारी ज्ञानेश्वर कांदळगावकर, सूरज रेडकर यांच्यासह स्थानिक मच्छीमार व ग्रामस्थ सहभागी झाले होते.
